اللي خدته ام شعر تاخده القرعة

دا اللي جه في بالي لما شوفت صورة البرادعي النهاردة...
و دا فكرني بمدونتنا الحبيبة يمكن عشان فيه علاقة ما دنيئة بين القرعة و راس القرد
و عليه و بما اننا بدأنا بفكرة راس القرد من بدري (و ان كان مدخلنا انها حمرة مش قرعة) فاحنا اولى بيها منهم

و عليه و عملا بنفس مبدأ القرعة او الحمرة فانا بقترح تعديلات واسعة في الدستور و اعلان راس القرد دولة مستقلة و اعلن نفسي رئيس انتقالي يدينا و يديكوا طولة العمر

موافقون؟

اعلن راس القرد كيان ذاتي الحكم مستقل و على المقيمين خارجها مراعاة فروق التوقيت

أبو حصيرة

هى البلد مبقاش ليها كرامة ليه كده يعنى فى خلال السنتين اللى عدوا
حر ق 2 مصريين فى نقطة شرطة فى الكويت
ظهور فيلم وثائقى اسرائيلى يحتوى على اعترافات لمسئولين اسرائيليين بقتل الأسرى المصريين
خفر السواحل الليبى يغرق مراكب الصيادين المصريين
أمريكى يقتل مصرى من فوق بارجة امريكية فى قناة السويس
جلد الأطباء المصريين فى السعوديه
تفتيش البابا شنوده فى انجلترا
سب الرئيس المصرى فى الكنيست الاسرائيلى
واخرتها استباحة الاراضى المصرية كل عام من قبل اليهود بمناسبة مولد ابو حصيرة
انا اقترح توفيرا للنفقات نلغى وزارة الخارجية واذا كان على الكلمتين بتوع كسر رجل الفلسطينيين اللى هيدخلوا اض الوطن العزيز الغالى ممكن نخلى العادلى يقولهم وبلاها بقى كمان كلية سياسة واقتصاد أصل ايه لازمتها هما كلمتين اى عيل صغير ممكن يحفظهم ويسمعهم
"العلاقات المصرية بالدولة المذكورة لا تفريط فيها ولن نسمح لحوادث فردية بالتأثير على العلاقة بين البلدين"بس تقول الكلمتين دول وتبص الناحية التانية وتنحنى .ـ

ادارة المش عارف ايه المملوكة للدولة

"لم أفهم شيئا مما يقال عن برنامج إدارة الأصول المملوكة للدولة، بالرغم من أنني شخصيا حاصل على عدد 2 بكالوريوس، دبلوم دراسات عليا، وماجستير ودكتوراه وشهادات في الكمبيوتر وتحليل النظم، وأب لعدد 2 مهندس كمبيوتر وطبيب ومحاسب وهم أيضا لم يفهموا شيئا مما يقال ، وزوجتي أيضا لم تفهم شيئا مع أنها متخصصة في تعليم الرياضيات لمدة 30 سنة ، وزملائي أيضا لم يفهموا ، مع أنهم يدرسون الاقتصاد في الجامعة." 
دكتور أحمد إبراهيم عبد السلام

في تعليق على الخبر المنشور في موقع الشرق الأوسط

صور

شوية الصور دول وصلولى على الميل
لما اتفرجت عليهم حسيت ان الراجل اللى لمهم فيلسوف بشكل او بآخر فقلت اخد رأيكوا

تطبيع العلاقات بين المغرب و الجزائر... و جيرانا اللي فوق!!

المغاربة بيتكلموا عن التطبيع مع الجزائر... و الجزائريين بيقولوا لما المغرب يشوفوا نجوم ضهر الصحرا المغاربية.... و السوريين بيفكروا انهم يتكلموا في علاقات طبيعية مع لبنان... و مصر في نص التسعينات ضربت مواقع سودانية... و السعودية و اليمن من كام سنه كده كانوا بيخبطوا في بعض على الحدود... و لما قامت حرب لبنان الأخيرة، بعض الدول العربية اتكلموا في مسؤولية حزب الله عن الحرب مع إسرائيل... و حط دا كله على جنب و الإتنين من أصحاب الفخامة اللي ردحوا لبعض على الهوا في قمة عربية... و لا (على رأي واحد صاحبنا) الأخ التاني الله يرحمه بقى اللي بلاش نتكلم عليه أحسن!

ولا رئيس الدولة (بتاعتنا) اللي لما دولة شقيقة تجمعنا معاها معاهدة دفاع مشترك (سوريا) حصل عليها هجوم من دولة شقيقة تانية يجمعنا بيها معاهدة سلام و كويزات و حركات (إسرائيل) قال في سياق آخر مالوش علاقة بالهجوم سابق الذكر (بس بالصدفة كان في نفس التوقيت) إن مصر مش هتدخل في حرب جنب دولة لا تجمعنا بيها مصالح (يقصد سوريا طبعًا)...

كل دا كوم، و المبادرة العربية بقى كوم تاني خالص، المبادرة معناها ان احنا... الدول العربية "جمعاء" (ممكن تقع على اللأرض من الضحك من جمعاء) قررنا اننا نطبع العلاقات مع إسرائيل لو إسرائيل انسحبت لحدود 1976 و حل المشكلات الخلافية الرئيسية... و طبعا معنى الكلام ان "احنا" مش هيكونلنا اي كلام مع إسرائيل "الوحشة" لغاية لما تعمل الكلام "الحلو" دا...

بس فيه نقطتين في الموضوع دا... الأولى إن فاقد الشيء لا يعطيه... العرب أصلاً مش مطبعين مع بعض عشان يطبعوا مع إسرائيل... لا مش بس دول و حكومات... دا شعوب و فرق و منتخبات... شوف انت بس ماتشات الكورة كده و الشتايم و الضرب و اللي الجماهير بتعمله في بعض و لا يكونوش بيحاربوا "إسرائيل"... لاحظ منقصدش الدولة إنما كلمة مبهمة منقرضة تعني شيء مكروه، لكنها بلا شك ليست الدولة... و دا يجرنا للنقطة التانية، ألا و هي ان اصلا الدول العربية الرئيسية ليها علاقات أكتر من قوية مع إسرائيل (الدولة المرة دي) و الشعوب العربية لا فارق معاها إسرائيل و لا فلسطين و لا أي كلام من دا أصلاً... باستثناء الكام مظاهرة اللي عاملين زي ورقة التوت دول! فنسمع يا خويا كده عن إيه؟ معاهدات إسمها الكويز، و سفارات... و أعلام إسرائيلية بترفرف في دول عربية... و دول عربية بتشارك في حصار الفلسطينيين (اللي هم كمان بقوا حاجة مبهمة كده)...

بعد إذنكم، عشان أنا مطلوب كمراقب في مفاوضات تمهيدية لإحتمال غير متوقع لتطبيع العلاقات بين جيرانا اللي فوق... و جيرانا اللي تحت!!

اخوات اوباما

طبعا كلنا شفنا الرئيس الامريكى الجديد باراك اوباما اول رئيس أمريكى من اصول أفريقية بس الصراحة محدش دقق فى اصله خالص ، الراجل ابوه كان من كينيا اسمه حسين ومسلم عرف امه فى سنة 60 واتجوزها اول فبراير 1961 وخلفوا الواد اول اغسطس 1961 وبعد كده انفصل عن امه سنة 63 واطلقوا نهائيا سنة 64 وعاش اوباما مع امه.... وابوه رجع كينيا ومن 64 لحد 1982 حسين ماشافش ابنه غير مرة واحده يعنى اوباما مش اسود ولا حاجة ده لون بشرته كده بس لكن ماشافش حياة السود ولا عاش وسط السود ، بس مش ده المهم ، المهم هو حسين اوباما(الأب) بعد مارجع كينيا اتجوز وخلف ولا لأ ماحدش جاب سيره، لو الراجل ده اتجوز وخلف أحمد مثلا يبقى المواطن الكينى المقهور أحمد اوباما الأخ غير الشقيق لرئيس أكبر دوله فى العالم ...... والله هتبقى حاجة مسخرة.ـ

حصلنا الرعب!!

إلي أولياء الأمور‏:‏ أم تضرب‏13‏ تلميذة وتمزق ملابسهن‏!

أنا بصراحة ملقتش عنوان افضل من العنوان اللي استخدمته جريدة الأهرام عشان أستخدمه... الأهرام بتقول: بصوا... أهه، مش المدرسين اللي بيضربوا التلاميذ دا اولياء الأمور كمان... يا أولياء أمور يا ولاد التيييييييت انتوا مذنبين. مش عارف انا بحاول ألاقيلها ترجمة ما ساخر حتى مش لاقي... ملخص الخبر ان فيه بنت في رابعة ابتدائي راحت اشتكت لمامتها ان زمايلها مبيلعبوش معاها، راحت المدرسة و ضربت 13 تلميذه و قطعتلهم هدومهم (تحرش دا يا مرسي؟!) و بس خلاص... و الخبر دليل قد ايه اولاياء الأمور ولاد خمسة في ستة! (فيه نقطة جوهرية في الموضوع دا هكلم فيها بعد شوية، استحملوني شوية)

طبعًا الخبر دا جاء ردًا على هجوم موسع شنته الصحف المعارضة و المستقلة على منظومة التعليم بعد ما مدرس قتل طالب عنده من بضعة أيام، و استعرضت فيها الصحف "عنف المدرسين ضد الطلبة"... و ردت الأهرام، لا دا مش المدرسين دا اولياء الأمور كمان، و دا مش عارف تقصد ان المدرس و ولي الأمر في خانه واحده، من باب الهم طايلني و طايلك؟! و لا يعني الطلبة بقوا ملطشة اللي رايح و اللي جاي... و ان كان ممكن انا اعمل مقالة موسعة لعنف التلاميذ ضد المدرسين.... و يبقى عنف في عنف بقى و البادي أظلم، و يمكن نجيب وزير تربية من الداخلية و نسميها وزارة التهذيب و الإصلاح... و انا مش قادر افهم ليه الأهرام (لو عايزة ترد يعني) معبرتش عن ازاي ممكن نحل المشكلة، او حتى تذكر حاجات إيجابية بطل شغل "هات المصاصة بتاعتي" بتاع اطفال حضانة...

بس مش دا المهم.... سيبك من الكلام الفاضي دا كله... نرجع لمقالة الأهرام... أم دخلت مدرسة ضربت 13 تلميذة بإيديها و رجليها (شوف الغل يا مؤمن) و قطعت هدومهم، يعني لو الواحدة خدت في إيدها دقيقة بس هتحتاج قول يا سيدي 10 دقايق عشان تخلص العملية العسكرية دي... كان فين بقى المدرسين بسلامتهم طوال هذه المده بيتفرجوا و لا بيشجعوا...

مش عارف بصراحة هو المحرر في الأهرام مش واخد باله انه بمقاله زي دي بيدين التعليم اكتر و اكتر، و لا العالم دي لا مؤاخذة يعني... العتب على النظر!!

نص المقالة الأصلية من الأهرام:

إلي أولياء الأمور‏:‏ أم تضرب‏13‏ تلميذة وتمزق ملابسهن‏!‏القاهرة

 ـ من أماني ماجد‏:‏

يبدو أن عدوي الضرب في المدارس انتقلت من المدرسين إلي أولياء الأمور أنفسهم‏,‏ بل صاحب الضرب سب وقذف وتقطيع ملابس‏!‏ حدت هذا في إحدي المدارس الكبري بمدينة نصر‏,‏ فبعد أن رفضت بعض التلميذات في الصف الرابع الابتدائي‏,‏ اللعب مع زميلة لهن‏,‏ اشتكت التلميذة إلي والدتها‏,‏ التي حضرت في نهاية اليوم الدراسي لـتربي التلميذات كما طلبت التلميذة‏!‏ الأم شمرت عن ساعديها

وفي فناء المدرسة‏,‏ أوسعت التلميذات ضربا باليدين والقدمين‏,‏ حتي وصل الأمر إلي تمزيق بعض ملابس البنات الصغيرات‏,‏ وصاحب هذه المعركة سب وقذف‏!‏ ووصل ضحايا الأم إلي‏13‏ تلميذة مضروبة‏,‏ بعض أولياء الأمور تضامن مع التلميذات اللاتي ضربن‏,‏ بعد أن رفضت بناتهن الذهاب إلي المدرسة‏,‏ خوفا من تعرضهن للضرب والشتائم‏,‏ وتقدم‏30‏ من أولياء الأمور بشكوي للمدرسة للتحقيق فرفضت المديرة‏,‏ لكنهم قاموا بتحرير محضر بقسم مدينة نصر أول‏!‏

المصدر: جريدة الأهرام (عدد 31 أكتوبر 2008)

السادات

سواء كان الرئيس الراحل انور السادات اعظم رئيس جمهورية فى تاريخ مصر او كان هو الخائن الأعظم ، فليس هذا محل اهتمامى على الاطلاق. لكن الشئ الذى اثق فيه هو ان السادات هو أكثر رئيس جمهورية عامل هذا الشعب باحترام -ربما كان هذا احد اسباب قتله - على الأقل فى خطاباته بمقارنة بسيطة بين خطابات السادات ومبارك وناصر يتضح الاتى ... اولا ناصر كان يعتمد على الخطب الحماسية التى لا تسمن ولا تغنى من جوع فالرجل لا يبرر مايفعله، ولا يحاول اشراك الناس بأى صورة والمثير للسخرية ان الخطاب الوحيد الذى دعا فيه الناس للمشاركة هو خطاب التنحى لقد اتخذت قراراً ارجوكم ان تساعدونى عليه ، وياترى ماهو شكل المساعدة المنتظرة -العلم عند الله - اما مبارك فما يؤديه هو فاصل كوميدى اكثر منه خطاب جماهيرى تشعر وكأن كائن فضائى جالس ليخاطب شعبه الفضائى من خلال وسائل اعلامنا الأرضية باستثناء خطاب العلاوة اول مايو 2008 الذى أداه على طريقة الباعة الجائلين فى المواصلات العامة فيما عدا ذلك فالرجل يتحدث عن مسيرة التنمية او يمارس احب الأدوار الى قلبه ... دور العرافة "لقد حذرتهم ،ان هذا سوف يحدث ، لقد قلت لهم ، لقد نصحتهم قبل هذا " وبارك الله فيما رزق . لكن بمراجعة خطب السادات تجد الرجل يشرح ويتناول الموضوعات التى تهم الجماهير فهو يتحدث عن السياسة الخارجية ويتكلم عن الحكام باسمائهم " فلان قال كذا وفلان قال كذا ، لو قلنا أكاذيب فصححوا لنا ، الرجل يبرر قراراته :- لقد عزلت الانبا شنوده للاسباب كذا وكذا وكذا" قد نتفق او نختلف حول الأسباب لكن لا يمكن انكار ان الرجل يتعامل بطريقة اكثر تحضرا واحتراما من سلفه وخلفه.

أمة تتقن إفساد قادتها

 "أنا بعرف بالعالم العربي هناك شخصنة للأحداث لأنه علينا ونحن أمة تتقن إفساد قادتها عبر التاريخ علينا أن نرى بعين القائد والزعيم ونتحدث بلسانه ونسمع بأذنيه ولكن في نهاية المطاف السلام لن يكون بالشخصنة، إذا كان الشخص موجودا الأمور مهمة وإن كان غير موجود فالأمور.."

صائب عريقات/ رئيس دائرة المفاوضات في م.ت.ف

المصدر: الجزيرة